Баскөлде «арнайы жөндеуден өткен» мәдениет үйі қирап тұр: Павлодарда депутаттар шу көтерді

Павлодар облысының Баскөл ауылындағы мәдениет үйінің «арнайы жөндеуден» кейінгі жағдайы жұртшылықты таңғалдырды. Сырт көзге әдемі көрінгенімен, ғимараттың есіктері құлап, қыш тақтайшалары түсе бастаған, төбесінен су ағып тұрғаны жайлы бейнежазба шықты, деп хабарлайды Orda.kz.

Шала-шарпы жөндеу жұмыстарын жүргізген – «Ер Алаш» ЖШС екен. Бұл олқылыққа облыстық мәслихат депутаты Сәбиден Мантықов бей-жай қарамай, мердігер мен жауапты шенеуніктерге ашық сын айтты.

Журналист Эльмира Әбетжанова әлеуметтік желіде жарияланған бейнежазбада:

«Міне сапасы. Қирап жатыр», – дейді депутаттар сахнаның еденін алып жатып.

Ал мердігер болса:

«Мен не деймін енді? Қателіктер бар. Жасаймыз. Болмашы нәрсе ғой», – деп жауап берді. 

Мантықовтың әріптестері Виталий Соломкин, Рустам Мазғұтов және Александр Толмачев те жағдайға назар аударып, ауылдағы мектеп ғимаратына қатысты сын айтты.

Баскөл мәдениет үйінің Instagram парақшасында соңғы жазбада мәдениет үйінің мердігері Санат Камалиевке алғыс айтып жазба жариялаған. Онда мердігердің мәдениет үйіне радиатор сыйлағаны айтылған. Ал дау туралы ешқандай ақпарат жоқ.