Бас прокуратура рейдерлікке қатысты Нұрбол Назарбаевтың аты аталған істі қайта жандандырды

Бас прокуратура қарағандылық кәсіпкері Қуат Ерментаевтың ісін қайта қарады. Ол өз бизнесін Қазақстанның тұңғыш президентінің жиені тартып алды деп мәлімдеген, деп хабарлайды Orda.kz.

Бұған дейін Алматы қаласы бойынша Экономикалық тергеп-тексеру департаменті Ерментаевқа тиесілі «PORUS» ЖШС-нің жарғылық капиталындағы 16% үлесті заңсыз қайта тіркеу фактісі бойынша тергеу жүргізген. Бұл іс Қылмыстық кодекстің 249-бабы «Рейдерлік» бойынша қозғалған болатын. Алайда 2024 жылғы 22 ақпанда тергеу «қылмыстық құрамның болмауына байланысты» тоқтатылған.

Енді жағдай өзгерді. Ерментаев ұсынған материалдар мен жаңа дәлелдерді зерделегеннен кейін, 2025 жылғы 9 қазанда істі тоқтату туралы қаулы күшін жойды. ЭТД тергеушілері рейдерлік жолмен тартып алу жағдайларын қайта тексеруге кірісті.

«Қазіргі уақытта Алматы қаласы бойынша ЭТД аталған фактілерді жан-жақты әрі объективті тексеруге бағытталған қосымша тергеу әрекеттерін жүргізіп жатыр»,— деп жауап берді бас прокурор Берік Асылов депутаттық сауалға. 

Қуат Ерментаевтың оқиғасына Мәжіліс депутаты Ермұрат Бапи назар аударып, Нұрбол Назарбаевтың әрекеттерін тергеуді талап еткен.

«Біздің сауалдарымызды азаматтардың отыз жылға жуық қысым мен заңсыздықтан зардап шеккеніне  қатысты әділдік орнатуға ұмтылыс деп түсіну керек»,— деді Бапи 2025 жылғы 1 қазанда Мәжілістің пленарлық отырысында. 

Депутатқа бірнеше рет Нұрбол Назарбаевқа қатысты рейдерлік істердің құрбаны  болғанын айтқан кәсіпкерлердің өтініштері түскен. Олардың арасында Қарағандыдан Қуат Ерментаевтың да мәлімдемесі бар.

«Егер құқық қорғау органдары осындай азаматтардың өтініштерін елемесе, бұл президенттің бастамасына опасыздық деп бағалануы тиіс»,— деп мәлімдеді депутат. 

Нұрбол Назарбаевтың есімі мұндай оқиғаларда бұған дейін де аталған. Бұған дейін «Almaty әйнек» зауытының директоры Әзім Абдуллаев Қазақстан президентіне жолдаған өтінішінде Болат Назарбаевтың отбасы тарапынан рейдерлік әрекет болғанын мәлімдеген.