«Назарбаевтардың дегенін орындаған»: Депутат экс-президенттің туыстарына қатысты істі қарауды талап етті

Мәжілісте қайтадан Нұрбол Назарбаевтың қызметіне байланысты заң бұзушылықтар тақырыбы көтерілді, деп хабарлайды Orda.kz.

Депутат Ермұрат Бәпи мәжіліс отырысында бас прокурор Берік Асыловқа жүгініп, әділеттілікті қалпына келтіруді және рейдерлік шабуылға қатысты жабық қылмыстық істі қайта қарауды талап етті.

Бәпидің айтуынша, оған жүгінген зардап шеккен азаматтар заңсыз әрекеттердің құрбаны болғанын алға тартты. Олардың бірі – Қарағандыдан кәсіпкер Қуат Ерментай. Ол рейдерлік шабуылдан кейін барлық мүлкінен айырылып, аса қиын жағдайға тап болғанын мәлімдеді.

«Міне, сол «мықты» Нұрбол Назарбаев жасаған зорлықтан араша сұрап, рейдерлік жолмен тартып алынған бизнесін қайтарып беруді өтінген қарағандылық Қуат Ерментаев деген азаматтан тағы да өтініш түсті. Бұл жігіт сол рейдерлік шабуылдан кейін, барлық мүлкінен айырылып, тақырға отырып қалған. Бір қызығы, өтініш берушінің талабы бойынша 2022 жылы Алматы қаласының прокуратурасы мен Алматы қаласы бойынша экономикалық тергеп-тексеру департаменті оның мүлкін, атап айтқанда «PORUS» ЖШС-дегі үлесін рейдерлік басып алу фактісі бойынша қылмыстық іс қозғаған екен. «Бірақ белгілі себептерге байланысты, мен ол кезде рейдерлік басып алу Нұрбол Назарбаевтың нұсқауы бойынша жасалды деп айта алмадым» дейді менің депутаттық қабылдауымда болған өтініш иесі. Бірақ арада екі жыл өткенде – 2024 жылы Алматы қаласының прокуратурасы қозғалған қылмыстық істі «қылмыс құрамының болмауына байланысты» деген желеумен тоқтатқан. Себебі айтпасада да түсінікті: прокуратура Назарбаевтардың дегенін орындаған», – дейді Ермұрат Бәпи.

Депутат мұндай шешімдер негізсіз екенін атап өтті.

Айта кетейік, бұған дейін «Алматы әйнек» зауытының басшысы Әзім Абдуллаев, бұрын Қазақстанның бірінші президентінің інісі Болат Назарбаевқа ай сайын «алым-салық» төлегенін айтқан, енді ол тергеу органдарынан өзінің бизнесін рейдерлік жолмен басып алу ісін тоқтатпауды талап етіп жатыр.