Балғынбек Имашев пен баласының басы тағы дауға қалды

Айтыскер Балғынбек Имашевтың ұлынан қажылыққа жолдама сатып алдық деген 40 адам полиция басқармасына барып шу шығарды, деп хабарлайды Orda.kz. 

Сәуір айында Данияр Имашев алаяқтық фактісі бойынша тергеуге алынған еді. Ол «Qazaq Travel» компаниясының атқарушы директоры ретінде Медина мен Меккеге 40 шақты адамды жібере алмай қалған. Қажылығы мен қаражатынан қағылған бір топ адам полицияға арыз жазды. Бұл іс аясында үш адам күдікті деп танылған, олардың қатарында компанияның бұрынғы атқарушы директоры Данияр Имашев та бар.

Енді еліміздің түкпір-түкпірінен келген 40 шақты адам қаражатын қайтара алмай жүр. Олар полиция бөліміне барып, тергеудің қалай жүріп жатқаны туралы сұрастырды. 

Қажылыққа барамыз деп ниет еткендердің әрқайсысы 500 мың теңгеден төлеген. Имашев бас-аяғы 20 млн теңгедей қайтаруы керек. Сан соғып қалғандар Балғынбек Имашевтың жарнамасына алдандық деп отыр. Енді айтыскер де, ұлы да хабарласпай отырған көрінеді. 

Айта кетейік, бұған дейін айтыскер ақын Балғынбек Имашев ұлы Данияр Имашевті алаяқ дегендерге істің қалай болғанын егжей-тегжейіне дейін айтып берген еді.