Балғынбек Имашев ұлын алаяқ дегендерге жауап берді

Айтыскер ақын Балғынбек Имашев ұлы Данияр Имашевті алаяқ дегендерге істің қалай болғанын егжей-тегжейіне дейін айтып берді, деп хабарлайды Orda.kz.

Nege сайтына берген сұхбатында Имашев ұлының «Qazaq Travel-де» атқарушы директор болып жұмыс істегеніне бар болғаны 3 ай толғанын, әрі әлеуметтік желіде айтылып жатқан алаяқтықты жасамағанын мәлімдеді.

«Ұлым онда атқарушы директор болып жұмыс істегенімен қаржы жағына араласпады. Менің ұлым болған соң ғана алаяқ деп шулатып жіберді. Ол ақшаны жымқырып, алаяқтық жасаған жоқ, бұл шындыққа жанаспайды», – деді айтыскер.  

Сонымен қатар, Балғынбек Имашевтің айтуынша, қажылыққа бармақ болған 50-ге жуық адам алдымен істің мән-жайын білмей, арыз жазбай, әлеуметтік желде айқай-шу шығарған. Артынша компания ұшақ уақытында ұшпайтын болған соң, қажылықты бірнеше күнге кешіктіргені анықталды. 

«Құқықты қорғаған дұрыс. Бірақ бірден әлеуметтік желіде шу шығармай, алдымен компаниямен сөйлесіп, мәселені бейбіт жолмен шешуге тырысқан жөн. Иә, тур кешікті, рейс ұшпады, бірақ компания із-түзсіз жоғалып кеткен жоқ. Кеңсесі ашық. Қазір туристердің ақшасы қайтарылды. Сол себепті «алдады» немесе «алаяқ» деуге асықпау керек», –деді Имашев.

Еске сала кетейік, «Qazaq Travel» компаниясы 50-ге жуық қажылыққа бармақ болған адамның ақшасын алып, кеңселерін жауып, жоқ болып кетті деген ақпарат әлеуметтік желіде айтылды. Соның ішінде айтыскер ақын Балғынбек Имашевтің ұлы Данияр Имашевтің де қатысы бар деген дерек тарады.