«Баланың еміне жиналған 481 млн»: Елден жылу жиған ерлі-зайыптыларға қатысты тергеу аяқталды

Баласының еміне деп халықтан жылу жинап, қаражатты жеке бас пайдасына жұмсаған ерлі-зайыптыға қатысты алаяқтық фактісі бойынша тергеп-тексеру аяқталды, деп хабарлайды Orda.kz. 

Тергеу мәліметі бойынша, ерлі-зайыпты Тотақановтар денсаулығында кінәрат бар баланы бейнеге түсіріп, әсерлі бейнежазбалар дайындаған. Кейін оны Instagram және Facebook арқылы жарнамалап отырған. Сол арқылы айыпталушылар 1,3 млрд теңгеден астам қаражат жинаған.

Олар елордадан 3 пәтер, жер телімі, 5 автокөлік сатып алған. Сонымен қатар, қаражаттың бір бөлігі құмар ойындарына жұмсалған.

Ең сорақысы, қайырымдылық қаржысын тұрақты түрде алып отыру үшін олар келіп түскен қаражаттың үштен бір бөлігі — 481 миллион теңгеден астам ақшаны әлеуметтік желідегі парақшаларын жарнамалауға жұмсаған. Meta Ads арқылы жүргізілген жарнама аудиторияны едәуір кеңейтіп, қайырымдылық көлемін арттыруға мүмкіндік берген.

Күдіктілер Түркиядағы LIV Hospital клиникасында 84 миллион теңге тұратын ота жасатамыз деген сылтауды да пайдаланған. Қажетті қаражат жиналғанымен, шетелде ота жасалмаған. Керісінше, олар Instagram парақшасында әуежайдағы «ұшып бара жатқан» көріністі бейнелейтін ролик жариялап, операция сәтті өтті деген жалған ақпарат салған.

Сотқа дейінгі тергеп-тексеру басталғанын білген соң, олар қылмыстық жолмен алынған активтерді тәркілеуден жасыру мақсатында жер телімін үшінші тұлғаның атына рәсімдеген.

Күдіктілер үйқамаққа алынды. Қазіргі уақытта қылмыстық іс сотта қаралып жатыр.

Айта кетейік, Шу ауданындағы мектептердің бірінде оқу ісінің меңгерушісі ауылдастарының зергерлік бұйымдары мен қаражатын ұрлап кетті.