Балалар айқайлап, жылап, талып жатыр: Бағанашылдағы балалар үйіне депутат келді

№1 балалар үйінің тәрбиеленушілерін Бағанашылдан Қонаев қаласына көшіру мәселесі әлі де шешілмей отыр. Оқиға орнына мәжіліс депутаты Бақытжан Базарбек пен қоғам белсендісі Аружан Сайын келді, деп хабарлайды Orda.kz. 

Көшеде көшіруге қарсы болған балалар айқайлап, жылап, талып қалып жатыр. Кейбірі полицейлерге тап беріп, автобусты шайқап, жүргізбей тұр.

Бақытжан Базарбек жағдайға қатысты өз көзқарасын білдіріп, бірнеше маңызды сұрақ қойды:

«Мен балаларды түсінемін. Өзімді олардың орнына қойып көруге тырыстым. Бұл көшудің артында қандай себеп жатыр? Егер барлық бала Қонаевқа көшсе, бұл ғимараттың болашағы не болмақ? Балалар үйін сүріп, орнына элиталық коттедждер мен пентхаустар салғалы жатқан жоқ па? Барлығы ашық әрі жария түрде болуы керек. Бізге балаларды көшіру жоспарланған Қонаевтағы жаңа мекемеге және Бағанашылдағы қазіргі ғимаратқа қатысты барлық құжаттарды көрсетуі тиіс. Қонаевтағы ғимарат мемлекет балансына қабылданған ба? Маған оның қабылданбағаны айтылды. Ал Бағанашылдағы ғимараттың сейсмикалық тұрақсыздығы туралы қорытындыны көздеріңізбен көрдіңіздер ғой?».

Полиция өкілдері оқиғаға қатысты түсініктеме бермей отыр.

Қоғам белсенділерінің бір бөлігі таңертең автобуспен Қонаевқа жеткізілген балалардың жағдайын білу үшін сол жаққа бет алды.

Ал Алматы облысы әкімдігінен Базарбек пен қалған белсенділер Бағанашыл мен Қонаевтағы ғимараттарға қатысты барлық құжаттарды жариялауды талап етіп жатыр.

Айта кетейік, оқиға орнындағы Orda.kz тілшісі тікелей ақпарат таратып отыр. Ол таңертең ғана балалар үйінің тәрбиеленушілері көлікке мінбей, қарсылық танытып жатқанын хабарлаған еді. Балалар арасында бір қыз есінен танып қалды, тағы бір бала қолын жарақаттап алды. Оқиға орнына полиция мен жедел жәрдем қызметкерлері келді.