Балаева тұрмыстық зорлық-зомбылық туралы: Әрбір қылмыскер заң бойынша жауап береді

Мәдениет және ақпарат министрі Аида Балаева Халықаралық әйелдерге қатысты зорлық-зомбылықпен күрес күніне байланысты Қазақстан халқына видеоүндеу жариялады, деп хабарлайды Orda.kz.

Видеоны министр Instagram парақшасында жариялады. Шенеунік зорлық-зомбылыққа қарсы күресте күш біріктірудің маңыздылығын еске салды.

Оның айтуынша, күн сайын дүние жүзінде жүздеген әйелдер физикалық, психологиялық және жыныстық зорлық-зомбылықтан зардап шегеді.

«Ажырасу  әйелдерге қудалаудан құтылуға әрдайым көмектеспейді. Олардың көпшілігі үндемейді, ұялады немесе не болып жатқан нәрсені айтуға қорқады. Әйелдерге қатысты зорлық-зомбылық тек қорлау және құқықтарын бұзу ғана емес, сонымен қатар гендерлік теңдікке елеулі кедергі болады», - деді Балаева. 

Сонымен қатар ол тұрмыстық зорлық-зомбылық жеке отбасының ғана емес, жалпы қоғамның проблемасы екнін атап өтті.

«Зорлық-зомбылыққа жол бере отырып, біз әділдік пен теңдікке орын жоқ қоғам құрамыз», - деп есептейді министр.

Сондай-ақ ол елімізде тұрмыстық зорлық-зомбылықтан зардап шеккен әйелдерге арналған сенім телефоны жұмыс істейтінін еске салды. +7 776-577-92-67 нөміріне хабарласқандарға тегін психологиялық және заңгерлік көмек көрсетіледі.

Оның айтуынша, еліміздегі әрбір әйел өзін қауіпсіз және еркін сезінуі керек.

«Сіздің мәртебеңіз бен қаржылық жағдайыңызға қарамастан әр қылмыскер өз әрекеті үшін заң бойынша жауап береді», - деп түйіндеді ол.