Балаева, Қарин және Досаевпен кездесу: «Өзбекстан ханшайымы» Алматыға не үшін келді?

17 наурыз күні Өзбекстан президентінің көмекшісі Саида Мирзиеева Алматыдағы Абай атындағы ұлттық опера және балет театрына келді, деп жазады Orda.kz.

Саида Мирзиееваны «Лазги – Жан мен Махаббат биі» балетінің премьерасында мәдениет министрі Аида Балаева, мемлекеттік хатшы Ерлан Қарин және Алматы әкімі Ерболат Досаев қарсы алды. Өзбекстан президентінің қызы осы кездесуден түсірілген суреттерін әлеуметтік желіде жариялады.

Саида Мирзиеева бұған дейін Instagram парақшасында Алматыға сапары жайлы хабарлаған еді.

«Мұндай мәдени шаралар өнеріміздің сұлулығын ашып қана қоймай, халқымыз арасындағы достық пен бауырластық байланыстарын нығайтып, өзара қарым-қатынастардың жаңа деңгейге көтерілуіне ықпал етеді. Біз Орталық Азия мемлекеттерімен экономикалық, саяси және мәдени ынтымақтастықты кеңейтуге өз үлесімізді қосуды мақсат етеміз. Халқымыз арасындағы келісім мен бірлік мызғымас тұтастық орталығына айналады деп сенеміз», – деп жазды Мирзиеева.

Бұған дейін ол Қазақстан мен Өзбекстан арасындағы қарым-қатынасты нығайтудың маңыздылығы туралы бірнеше рет айтқан.

Еске сала кетейік, 2024 жылдың 5 тамызында Астанада Zakovat интеллектуалдық ойындар турнирінің ашылуында сөйлеген сөзінде Саида Мирзиеева соңғы жылдары екі ел арасындағы жағдайдың қалай өзгергенін атап өткен еді.

«Неліктен мен бүгін өзімді Қазақстанда үйдегідей сезінемін? Бұрын қалай болғанын есіңізде ме? Менің есімде. Салқын қарым-қатынас. Өзбекстан мен Қазақстан арасындағы шекарада сағаттап кезек күту. Сенімсіздік. Біз өзімізді үйдегідей сезіне алдық па? Ал бүгінде Өзбекстан мен Қазақстан арасындағы достық қарым-қатынас – бүкіл әлемге үлгі», – деген еді Мирзиеева.