«БАҚ-ты кіргізбеді, жария етуге тыйым салды»: Талғарда Хасан Қасымбаевтың соты өтіп жатыр

Бүгін Талғар аудандық сотында Хасан Қасымбаев және басқа да тұлғаларға қатысты «адам ұрлау», «денсаулыққа қасақана ауыр зиян келтіру» және «бопсалау» айыптары бойынша қылмыстық іс қаралып жатыр. Бүгінгі сот отырысында жәбірленушілерден және куәгерлерден жауап алынады.

Orda.kz тілшісі сотқа онлайн қатысып, тікелей ақпарат таратып отыр.

Кезекті сот отырысында тілшілер сот залына кіре алмай, онлайн режимде қатысуға мәжбүр болды. Тілшілер үшінші мәрте сот процесін онлайн қарап отырғандарына наразы болды. Алыстан сотқа арнайы келген журналистер басқа бөлмеге жайғасып, соттың барысын тек онлайн бақылауға мүмкіндік алды. Тілшілер бірнеше рет судьяға өтініш жасап, сот залына кіруге рұқсат сұрағанымен, өтініштері қараусыз қалды.

Еске салсақ, бұл сот отырысы елдің бар назарын аударып отырған резонанс тудырған іске қатысты өтіп жатыр.

Судья Айнагүл Тукубаева жәбірленушілер мен куәгерлердің айғағын баспасөз бетінде жариялауға тыйым салды. Сол себепті оқиғаның мән-жайы хабарланбайды. Куәгерлер де аты-жөндерін жариялауға қарсылық танытқан. 

Бүгінгі сот отырысында жәбірленуші Аюпжан Тажиевтен және 6 куәгерден жауап алынады.

Бұған дейінгі сот отырысында жәбірленуші Арман Әлімовтен жауап алынып, іске қатысты бейнежазба зерделенген болатын. Істе осы екі жәбірленуші бар.

Айта кетейік, 2024 жылдың 2 қарашасында Хасан Қасымбаев уақытша ұстау изоляторына қамалды. Ол 2021 жылы ережесіз жекпе-жектен жаттықтырушы Арман Әлімовтің денсаулығына қасақана ауыр зиян келтірді және ұрлады деген күдікке ілінген.

Айта кетейік, Хасан Қасымбаевтың есімі Шерзат Полаттың өлімінен кейін айтыла бастады. 2024 жылғы 4 қазанда «Қамажай» дүкенінде болған жанжалда Шерзат Полат қаза тапты. Бұл оқиға қоғамды дүр сілкіндірді. Осы жағдайдан кейін Талғар аудандық әкімдігінде қызмет атқарған Хасан Қасымбаевтың бауыры Аслан Қасымбаев жұмыстан босатылды. Ресми сот кабинеті дерегіне сүйенсек, Хасан Қасымбаевтың тағы бір бауыры Ержан Қасымбаев бұған дейін «адам өлтіру» бабымен істі болған. Ол кеден қызметкері Медет Жамашевті қасақана өлтірді деп айыпталған. 

Ал ІІМ «хуторлық» қылмыстық топ жайлы сөз бұрқ ете қалғанда-ақ ақпаратты жоққа шығарған болатын.