Байзақ ауданында полиция басшысының экс-орынбасары пара алған

Байзақ аудандық соты аудандық полицияның тергеу бөлімшесі бастығының бұрынғы орынбасары Талғат Сәрсеновке үкім шығарды. Ол пара алғаны үшін кінәлі деп танылып, 9 млн теңге айыппұл салынды, деп хабарлайды Orda.kz.

Сот мәліметінше, Сәрсенов Қылмыстық кодекстің 366-бабының 2-бөлігі бойынша кінәлі деп танылған. Сонымен қатар ол подполковник шенінен айырылып, өмір бойына мемлекеттік қызметте және мемлекеттік ұйымдарда жұмыс істеу құқығынан айырылды.

Сәрсенов 31 шілдеден бері қамауда болған. 27 тамызда сот оны үкім залында босатып, қамау шарасын үкім заңды күшіне енгенге дейін ешқайда кетпеу туралы қолхатқа ауыстырды. Алайда сот үкімінің қолдағы үш беттік нұсқасында бірқатар сұраққа жауап жоқ.

Атап айтқанда, Сәрсенов параны нақты не үшін алғаны, оған ақшаны кім ұсынғаны және қаражаттың қалай берілгені көрсетілмеген.

Іс материалдарындағы дәлелдемелер қатарында адвокат А. Жаманбаеваның Сәрсеновпен және жәбірленуші Е.Тастанбековпен сөйлесулерінің жазбалары, арнайы техникалық құралдарды беру материалдары, химиялық өңдеуден өткен ақша және тінту нәтижелері бар. Алайда адвокаттың іс бойынша рөлі үкімде түсіндірілмеген.

Сонымен қатар іс материалдарында ҚР ҚК-нің 104-бабының 1-бөлігі бойынша, яғни абайсызда адам өліміне әкеп соғу фактісіне қатысты басқа қылмыстық іс бойынша құжаттар бар. Параның осы іске қатысы бар-жоғы және полицейдің ақша үшін қандай әрекет жасауы тиіс болғаны да құжатта түсініксіз.

Тағы бір сәйкессіздік ақшаға қатысты. Сот пара көлемін 300 мың теңге деп көрсеткен. Осыған байланысты Сәрсеновке оның 30 еселенген мөлшері — 9 млн теңге айыппұл тағайындалған.

Алайда үкімнің үшінші бетінде тәркіленген ақша 20 мың теңгелік 20 купюрадан тұрғаны жазылған. Бұл — 400 мың теңге. Мұндай сәйкессіздік құжатта екі рет кездеседі. Осыған байланысты параның нақты сомасы 300 мың ба, әлде 400 мың теңге болғаны түсініксіз.

Сондай-ақ Сәрсеновке тағайындалған жазаның мөлшеріне қатысты да сұрақ туындайды. Ол ҚК-нің 366-бабының 2-бөлігі бойынша сотталғанымен, оған 30 еселенген мөлшерде айыппұл белгіленген. Қолдағы мәтінде соттың дәл осы жазаны таңдауына қандай жағдайлар негіз болғаны көрсетілмеген.

Сот үкімі іс бойынша нүкте қойғанымен, құжатта қылмыстың мән-жайына қатысты бірқатар сұрақ жауапсыз қалған. Үкімнің қолдағы үш беті толық сот актісі ме, әлде сипаттау-уәждеу бөліктері жоқ қысқартылған нұсқасы ма — әзірге белгісіз.

Оқи отырыңыз: 

• Алматыда ұшақ өртенді
• Тоқаев: Қыркүйектің екінші жартысында Халық Кеңесі жасақталады