БАӘ-де 15 жасқа дейінгі балаларға әлеуметтік желілерді пайдалануға тыйым салынды

Біріккен Араб Әмірліктерінде 15 жасқа дейінгі балаларға әлеуметтік желілерді қолдануға тыйым салынды. Тиісті шешімді елдің министрлер кабинеті қабылдады, деп хабарлайды Orda.kz Wam.ae агенттігіне сілтеме жасап.

Ел билігі қабылдаған жаңа заңға сәйкес, ендіші жерде 15 жасқа толмаған балалар әлеуметтік желілерде жеке аккаунт ашып, оны пайдалана алмайды. Шектеулер контент жариялау, пікір жазу, ашық топтарға қатысу және онлайн өзара әрекеттесудің басқа да түрлеріне қатысты.

Заңнамаға сәйкес, 15 пен 16 жас аралығындағы жасөспірімдерге платформаларды қолдануға рұқсат беріледі, алайда олардың аккаунттары қосымша шектеулермен жұмыс істейді. Әлеуметтік желілер бейтаныс қолданушылармен байланысқа қатысты бірқатар функцияларды өшіріп, ата-аналарға бақылау құралдарын ұсынуға міндетті болады.

Сонымен қатар, БАӘ билігі әлеуметтік желілерге пайдаланушылардың жасын тексерудің сенімді жүйесін енгізуді міндеттеді. Бұл үшін компаниялар цифрлық жеке сәйкестендіруді, биометриялық технологияларды және жасанды интеллект негізіндегі құралдарды қолдана алады. Яғни, тіркелу кезінде тек туған күнді көрсету жеткіліксіз болады.

Құжатта кәмелетке толмағандардың деректерін жекелендірілген жарнама мен коммерциялық мақсаттарда пайдалануға да тыйым салынған.

Жаңа талаптардың орындалуын БАӘ-нің мемлекеттік реттеуші органдары қадағалайды. Олар ережелер бұзылған жағдайда платформаларды толық немесе ішінара бұғаттауға дейінгі санкциялар қолдана алады.

Билік компанияларға барлық нормаларды енгізу үшін 12 ай уақыт берді.

Бұған дейін Ұлыбритания премьер-министрі Кир Стармер де 16 жасқа дейінгі балаларға әлеуметтік желілерді пайдалануға тыйым енгізілетінін мәлімдеген болатын. Бұл шектеулер 2027 жылдың басында күшіне енеді.

Оқи отырыңыз:

• Әлеуметтік желідегі қандай пікірлер үшін нақты жаза тағайындалуы мүмкін?
• Енді 15 жасқа толмаған жасөспірімдер әлеуметтік желіні қолдана алмайды
• Қазақстанда TikTok-қа шектеу енгізілуі мүмкін