Әзірбайжан әскерін Газадағы қауіпсіздікті қамтамасыз етуге көмек ретінде жібермекші

Әзірбайжан соғыстан кейін Газа секторының қауіпсіздігін қамтамасыз етуге көмектесетін Халықаралық тұрақтандыру күштерінің құрамына әскер беруге келісті, деп жазады Orda.kz The Times of Israel басылымына сілтеме жасап.

Бүгінгі таңда Индонезия БҰҰ мандаты бойынша миссия аясында 20 000 жауынгер жіберетінін мәлімдеп, Халықаралық тұрақтандыру күштеріне әскер беруге жария түрде міндеттелген жалғыз ел.

 «Алайда АҚШ басқа елдермен келіссөздер жүргізіп, Әзірбайжаннан осындай міндеттемеге жеке түрде қол жеткізді» деп жазылған мақалада. 

Хабарламада айтылғандай, Әзірбайжанның Вашингтон мен Тель-Авивтегі елшіліктері жағдайға түсініктеме беру туралы бірнеше мәрте өтініштерге үн қатпаған.

«Өткен айда БҰҰ Бас ассамблеясының көпжақты кездесуі барысында Түркия президенті Режеп Тайып Ердоған АҚШ президенті Дональд Трампқа Анкара да Газаға әскер жіберуге дайын екенін мәлімдеген болатын, Бұл туралы жағдайды білетін екі дереккөз хабарлады» деп жазады басылым. 

 Сонымен қатар, соғыс басталғаннан кейін екі ел арасындағы қарым-қатынастың нашарлауы жағдайында Израиль түрік әскерлерінің Газа секторында болуына жол бере ме, жоқ па екені әзірге белгісіз, деп жазылған мақалада.

 Қазан айының басында АҚШ президенті Дональд Трамп ХАМАС қозғалысына соғыс әрекетін тоқтату жөніндегі бұрын ұсынылған келісімді қабылдауға қатысты «Тозақ отын жаудырамын» деп соңғы ультиматум қойды.

 Сәуір айында қозғалыс Газадағы соғысты тоқтатуға, барлық кепілге алынғандарды босатуға және бес жылдық бітімгершілік орнатуға дайын екенін мәлімдеген болатын.