Азат Перуашев Тоқаевтың сынынан кейін «айыппұлстан» сөзіне қайтадан түсініктеме берді

Мәжіліс депутаты Азат Перуашев Президент Қасым-Жомарт Тоқаев сынынан кейін «айыппұлстан» деген сөзіне қайтадан түсініктеме берді, деп хабарлайды Orda.kz.

Оның айтуынша, бұл сөздің қате болғанын ол бұрын да мойындаған.

«Өткен жылы бұл сөз айтылған кезде, оның дұрыс емес екенін мойындадым. Біз парламентте дөрекі сөйлемеуіміз керек, мәдениетті түрде сөйлеуге міндеттіміз. Бұл туралы бір жыл бұрын да айтқанмын. Кеше Президент тек мені ғана емес, басқа да адамдарды сынға алды. Бұл – жұмыс, бұл – өмір. Президенттің сынын қабылдап, оны сабақ ретінде түсініп, әрі қарай жұмыс істеу керек», – деді Перуашев. 

Еске салсақ, 2024 жылғы 4 желтоқсанда мәжіліс Әкімшілік құқық бұзушылық туралы кодекске өзгерістер мен толықтырулар енгізу туралы заңды екінші оқылымда қабылдады. Азат Перуашев бұл құжатқа қарсы шығып, елдің «айыппұлстанға» айналып бара жатқанын айтқан болатын.

2025 жылғы 28 қаңтарда үкіметтің кеңейтілген отырысында Қасым-Жомарт Тоқаев Қазақстанға өз азаматтарымыздың жағымсыз атау тағып жатқанына наразылық білдірді.

«Әлемдік тәжірибе көрсеткендей, мәжбүрлеу шараларынсыз тәртіп орнату мүмкін емес. Сондықтан мемлекет әрекетіне түсіністікпен қарау қажет. Мұнда қоғамда диалог арқылы келісім болуы тиіс. Қалай болғанда да, мемлекет тарапынан заңдылық пен тәртіпті қамтамасыз ету үшін қабылданған шаралар елге түрлі жағымсыз атаулар тағуға себеп болмауы керек», – деген еді  мемлекет басшысы.  

Келесі күні Азат Перуашев «штрафстан» деген сөзі орынсыз болғанын ашық түрде мойындады.

2 маусымда мемлекет басшысы Алатау қаласын дамытуға арналған кеңеске қатысып, сөз сөйледі. Өз сөзінде президент елді «Айыппұлстан» деп атайтын депутаттар туралы қатаң пікір білдірді.

Өз сөзінде Қасым-Жомарт Тоқаев «Таза Қазақстан» тұжырымдамасына тағы да арнайы тоқталды.

«Қазіргі әлемдегі әскери қақтығыстар күшейген тұрақсыз кезеңде еліміз үшін бейбітшілік пен тұрақтылық аса маңызды. Онсыз ешқандай реформа да, оң өзгеріс те болмайды. Сондықтан құқық қорғау органдары құқық бұзушылықтарға қатысты қатаң шаралар мен жазалар қолдануы тиіс. Кейбір адамдар, өкінішке қарай, олардың арасында парламент депутаттары да бар, елімізге немқұрайлы қарап, біздің құқықтық әрекеттерімізді «Штрафстан» немесе «Айыппұлстан» деп атайды. Ондайлар өз ой-өрісінің тарлығын көрсете берсін. Ал біздің халқымызға қоғамдық тәртіп пен қауіпсіздік қажет. Сондықтан біз бұл жолдан таймаймыз және «Заң мен Тәртіп» саясатын табанды түрде жалғастырамыз. Бұл – азаматтарымыздың талабы. Барлық қоғам мен әкімдер бұл мәселеге ерекше назар аударуы тиіс», – деді президент.  

Президент сондай-ақ елді мекендерді абаттандыру, көгалдандыру және экологиялық мәдениетті арттыру мәселелеріне ерекше көңіл бөлу қажеттігін атап өтті.

Оқи отырыңыз:

• Президент елді «Айыппұлстан» деп атайтын депутаттарды сынады
• Перуашев «Самұрық-Қазына» басшысының табысы туралы сұрады
• Перуашев ұсталған журналист Ботагөз Омарованы қолдауға дайын екенін айтты