AZAL ұшақ апаты туралы Ресей жасырған шындықты айтқан жолаушы көз жұмды

2024 жылғы 25 желтоқсанда Қазақстанның Ақтау қаласы маңында апатқа ұшыраған ұшақтың тағы бір жолаушысы көз жұмды, деп хабарлайды Orda.kz.

 Lent.az мәліметінше, Нурулла Сираджов бүгін таңертең өз үйінде қайтыс болған. Өткен жылы Сираджов жұбайымен бірге AZAL әуе рейсімен Грозныйға ұлына барып, онкологиялық ауруына байланысты ота жасатпақ болған. Алайда әуе апатына байланысты ота жүзеге аспады. Ерлі-зайыптылар ауыр жарақат алып, ауруханаға түскен болатын. Нурулла Сираджов алған жарақаттарынан айығып шыққанымен, қатерлі ісікті жеңе алмады.

Еске салайық, AZAL әуе компаниясының Embraer-190 ұшағы 2024 жылғы 25 желтоқсанда Ақтау порты маңында апатқа ұшыраған еді. Әуе кемесінде 67 адам болған, олардың 38-і, соның ішінде Қазақстанның алты азаматы қаза тапты.

Еске сала кетейік, осы ерлі-зайыптылар туралы жазған едік. Әуе апатынан кейін ұзақ уақыт бойы жұбайы Муслимат Сираджовамен байланыса алмаған Нұролла Сираджов палатаның босағасында тұрып, әйеліне қарап көзіне жас алды. Ұшақ апатынан аман қалған жолаушы Ресей жасырған шындықты айтты.