Автоматтар, гранаталар және контрабанда: Қазақстанда жүздеген қару тәркіленді

Ұлттық қауіпсіздік комитеті (ҰҚК) жыл басынан бері полиция және прокуратурамен бірлесіп, 12 автомат, 41 тапанша, 75 мылтық, 36 граната және 1603 түрлі калибрлі оқ-дәріні тәркіледі, деп хабарлайды Orda.kz.

ҰҚК мәліметінше, бұл қарудың басым бөлігі 2022 жылғы Қаңтар оқиғасы кезінде ұрланған. Комитет сол кезеңде қолды болған 608 қару-жарақты қайтарып алған.

Жағдайды ушықтыратын тағы бір фактор – Қазақстанға заңсыз қару кіргізу әрекеттерінің жалғасуы. Жақында ҰҚК көрші елден келетін қару контрабандасының жолын кесіп, 11 қаруды сатпақ болған шетелдікті ұстады. Қару көлік қаптамасына жасырылып, Қазақстан азаматтарының көмегімен шекарадан өткізілген.

Комитет қабылданған шаралар қылмыстық топтардың қаруға қол жеткізуіне және оны заңсыз мақсатта пайдалануына жол бермегенін атап өтті.

Бұған дейін ІІМ 2022 жылғы Қаңтардағы тәртіпсіздіктер кезінде тоналған қару-жарақ пен оқ-дәрілер жасырылған орындардың фотосын жариялаған болатын.