Автобус қағып кеткен 80 жасар зейнеткер көз жұмды

Қостанай қаласының Назарбаев даңғылында 80 жастағы зейнеткер әйелді автобус қағып кетті. Оқиға 28 желтоқсан күні сағат 13:31 шамасында орын алған. Бұл туралы ORDA. Қостанай облысы ПД баспасөз қызметіне сілтеме жасап хабарлады.

«Mercedes-Benz» маркалы автобусты басқарып келе жатқан 56 жастағы жүргізуші Назарбаев көшесінің бойымен №215 үйдің жанында дизель зауытына қарай келе жатып, 80 жастағы әйелді қағып кетті.

Ол «Алтын Арман» шағынауданынан «Юбилейный» шағынауданына қарай жолдың белгіленбеген бөлігінен өтіп бара жатқан.

Жол-көлік оқиғасы салдарынан жаяу жүргінші алған жарақаттарынан оқиға орнында көз жұмды. Оқиға бойынша тергеу басталды.