Ауыл мектептерінде директорлар жетіспейді

Өңірлерде мектеп директорлары тапшылығы байқалады, деп хабарлайды Orda.kz.

Мәжіліс депутаты Вера Кимның мәліметінше , 16 сәуірдегі жағдай бойынша мемлекеттік мектептерде директордың 454 орны бос, бұл жалпы мектептердің 6,5%-ын құрайды. Яғни, әр 15-ші мектепте басшы тағайындалмаған. Халықаралық тәжірибеде 1–3% деңгейі өзекті мәселе ретінде қарастырылса, 5%-дан жоғары көрсеткіш жүйелі шешімді талап етеді. Қазақстанда бұл көрсеткіш 6,5%-ға жетіп отыр.

Министрлік алқасында келтірілген дерекке сәйкес, 2025 жылы директорлыққа үміткерлердің тек 21%-ы ғана тестілеуден өткен. Бұл кадр тапшылығымен қатар, кадрларды даярлау және іріктеу сапасында да мәселе бар екенін көрсетеді.

«Бұл ретте кадр тапшылығы айқын аумақтық сипатқа ие. 454 бос лауазымның 399-ы ауыл мектептерінде, ал 56-сы қалалық мектептерде. Ең күрделі жағдай Ақмола облысында – 63 бос орын, Солтүстік Қазақстан облысында – 56 және Қарағанды облысында – 49. Сонымен қатар, 295 бос орын шағын жинақты мектептерге тиесілі, бұл ауылдық жерлердегі бос орындардың шамамен төрттен үш бөлігін құрайды».
 деді депутат.

Мәселенің негізгі себептері ретінде директорлық қызметтің жоғары жауапкершілігі, бірақ жалақының жеткіліксіздігі және ынталандыру тетіктерінің әлсіздігі аталды. Бұған қоса, директорлар тарапынан магистр және PhD дәрежесі үшін қосымша ақы мен біліктілікті әділ бағалау мәселесі бірнеше жылдан бері көтеріліп келеді.

Депутаттың пікірінше, бос басшылық орындары мектеп басқаруына тікелей әсер етіп, білім сапасының төмендеуіне, педагогикалық ұжымдардың әлсіреуіне және қала мен ауыл мектептері арасындағы алшақтықтың артуына алып келіп отыр.

Оқи отырыңыз:

• Мәжіліс депутаты базарларға дизайн-код енгізуді ұсынды
• Маслихат депутаттарының билігі күшейеді