Атыраулық көпбалалы ана сүндетке отырғызу бағасына наразы болды

Атырауда «Алтын алқа» иегері әкімдіктің Telegram-арнасында облыстық балалар ауруханасында сүндетке отырғызу отасының бағасы шарықтап тұрғанына шағымданды, деп хабарлайды Orda.kz Ақ Жайыққа сілтеме жасап. 

Көпбалалы ананың айтуынша, медициналық мекемеде бір баланы сүндетке отырғызу үшін 25 500 теңге сұраған. Отбасында егіз ұл болғандықтан, оларға жеңілдік ретінде бір балаға 18 000 теңге ұсынған. Алайда атыраулық әйел жалпы 36 000 теңге көпбалалы отбасы үшін ауырлық қылатынын айтты. Сонымен қатар, мемлекеттік мекемелерде сүндеттеу құны жеке клиникаларға қарағанда арзанырақ. Бірақ табысы төмен отбасылар үшін бұл мүмкіндік те қиынға соғады. 

Әкімдік өкілдері сүндетке отырғызу бағасы медициналық құралдар мен шығын материалдарының қымбаттауына байланысты екенін атап өтті.

Айта кетейік, мамырда Павлодарда баланы сүндетке отырғызамын деп денсаулығына ауыр зиян келтірген хирургке қатысты сот шешімі шыққан еді. Сот дәрігерге бір жыл мерзімге бостандығын шектеу жазасын тағайындап, пробациялық бақылау орнатты. Сонымен бірге ол қоғамдық жұмыстарға тартылатын болды.