Атыраудағы мұнай өңдеу зауытының бұрынғы бас директоры Досмұратов толығымен ақталды

Атырау облыстық соты қызметтік міндеттерін тиісінше орындамады деп айыпталған Атырау мұнай өңдеу зауытының бұрынғы бас директоры Мұрат Досмұратовтың ісін қайта қарады, деп хабарлайды Orda.kz. 

Сот барлық мән-жайды қайта зерттеп, Досмұратовтың кінәсі жоқ деген қорытындыға келді. Мұрат Досмұратовқа қарсы қылмыстық істі қайта қарау қорытындысы бойынша прокуратура оның әрекеттерінен қылмыс құрамын таппады. Айыптаушы тараптың өзі істі тоқтатуды және кәсіпорынның бұрынғы басшысын ақтауды сұрады.

Айта кетейік, 2022-2023 жылдар аралығында Мұрат Досмұратов жеткізуші әкелген жабдыққа АМӨЗ қаражатынан негізсіз ақша бөлініп, жалпы 1,9 млрд теңгеге технологиялық жабдықты жөндеу бойынша тиісті шарт жасасты деп айыпталды. Соның салдарынан негізсіз түрде 2 млрд теңгеге жуық қаражат жұмсалған. ҚР заңнамасына сәйкес, 371-баптың 2-бөлігі бойынша қылмыс жеңіл санатқа жатты. Алғашқы сот шешімімен Досмұратовтан мемлекет пайдасына 2 млрд теңге өндірілетін болған.

1963 жылы туған Мұрат Досмұратов Мәскеу мұнайхимия және газ өнеркәсібі институтын «Инженер-химик-технолог» мамандығы бойынша тәмамдаған. Әр жылдары «ҚазМұнайГаз», Kazakhstan Petrochemical Industries, KLPE және басқа да компанияларда басшылық қызметтер атқарған. Ол 2022 жылдың шілдесінен 2024 жылдың қаңтарына дейін Атырау мұнай өңдеу зауытының бас директоры қызметінде болды.

Еске салайық, 10 жылға бас бостандығынан айырылған Перизат Қайрат аппеляциялық сотқа шағым түсірді. Ол бұған дейін тағылған айыппен келіспейтінін айтқан еді.