Атырауда көшеде ұйықтап жатқан баланың қазіргі жағдайы белгілі болды

Көшеде картон қағаздың үстінде ұйықтап жатқан жерінен табылған 14 жастағы жасөспірімнің жағдайы туралы ресми ақпарат айтылды, деп хабарлайды Orda.kz. 

Өңірдегі бала құқықтары жөніндегі уәкіл Айжан Сәрсембаеваның айтуынша, қазір баламен психологтар жұмыс істеп жатқан көрінеді. Бірақ баланың психикалық ахуалы нашар екен. Ол психологтарға әртүрлі оқиғаларды айтып, қарама-қайшы жауаптар берген. Жасөспірім ұйқысыздық пен қорқынышты түстер көретініне шағымданған.

Дегенмен, педагогтар соңғы күндері баланың сабырға келіп, мамандармен байланысқа шыға бастағанын айтқан.

Уәкілдің айтуынша, бала әкесіне өкпелі екен. Жасөспірім үнемі қозғалыссыз жататын анасының ауруына әкесін кінәлайды. 

Айта кетейік, бұған дейін бұл жасөспірім өз үйіне кіру үшін әкесіне темекі тауып беруге мәжбүр болғаны, ал үш жастағы қарындасының үнемі ішімдікке салынған ата-анасының үйіндегі күмәнді адамдардың ортасында жүргені белгілі болған еді.