Атырауда 3 жасар қызды маскүнемдер арасында қалдырған ана құқығынан айырылуы мүмкін

Атырауда 14 жастағы жасөспірімді анасы мен ағасы үйге кіргізбей, ақша іздеуге мәжбүрлеген. Баланың жағдайы әлеуметтік желіде жария болған соң Orda.kz мән-жайды анықтады.

Көршілерінің айтуынша, 14 жастағы Кириллді ата-анасы мен ағасы күні бойы тамақ пен ақша іздеуге мәжбүрлеген. Егер ештеңе таппай келсе, оны үйге кіргізбей қайта шығарып жіберген. Ал пәтерде оның үш жасар қарындасы үнемі маскүнемдермен оңаша қалады екен. Анасы ішімдікке әуес, ағасы жұмыссыз, үйге үнемі мас ер адамдар келіп, ел-жұрттың мазасын алған көрінеді. Бүлдіршіннің балалық шағы дау-жанжалмен өтіп, Кирилл мектепке аш және қажыған күйде барып жүрген.

Атырау облысының полиция департаменті балаларды қатыгез отбасының қолынан шығарғанын растады.

«Балаларды тәрбиелеуге жауапсыз қарап, қауіпсіздігін қамтамасыз етпеген отбасында 14 жастағы жасөспірім мен 3 жасар бала тиісінше Кәмелетке толмағандарды бейімдеу орталығына және сәбилер үйіне орналастырылды»,  деп хабарлады ПД баспасөз қызметі.

Полиция мәліметінше, бір жыл бұрын сол ата-аналар балаларға қатысты міндеттерін орындамағаны үшін әкімшілік жауапкершілікке тартылған екен.

Қазіргі таңда іс материалдары кәмелетке толмағандар істері жөніндегі комиссияға дайындалып жатыр, онда ата-аналардың құқықтарын шектеу мәселесі шешілмек.