Атырауда депутаттың қатысы бар компания салған үйлер қирап жатыр

Атыраудағы Талқайран шағын ауданында орналасқан тұрғын үйлердің қабырғалары қақырап, жергілікті халық дабыл қағып отыр. Мемлекеттік бағдарлама аясында бес жыл бұрын салынған коттедждерде күрделі ақаулар пайда болған. Құрылысты «БатысАлянсСтрой» компаниясы жүргізген. Оның құрылтайшысы бұрынғы мәжіліс депутаты Әділ Жұбанов болған, деп хабарлайды Orda.kz. 

Тұрғындар үйдің қасбеттері мен ішкі бөлмелерінде жарықшақтар көбейгенін айтады. Кейбір баспаналардың іргетасы да бүліне бастаған.

Олардың болжамынша, мәселе құрылыс кезіндегі салғырттықтан немесе сапасыз материал қолданудан туындаған.

Әкімдіктің дерегінше, 2018 жылы «Нұрлы Жер» бағдарламасы бойынша 60 үй салынған.

Айта кетейік, Түркістан облысының Алғабас ауылында 18 қарашада ірі өрт шықты. 360 шаршы метрлік жеке үйде болған апат салдарынан 12 адам қаза тауып, үш адам жарақатпен ауруханаға жеткізілді.