Атырауда әйелін 35 жыл бойы қызғанып, ақыры атып өлтірген ер адам сотталды

Атыраудa 61 жастағы ер адам әйелі опасыздық жасамаса да күдіктеніп, оны өлтіргені үшін 15 жылға бас бостандығынан айырылды, деп хабарлайды Orda.kz. 

Қайғылы жағдайға 1990 жылы болған оқиға себеп болған. Бір дастархан басында отырған көршісі мас кезінде ер адамға оның қыздарының бірі туған қызы емес екенін айтқан. Бірақ, көршісі ертесіне масаң болғанын, олай айтуына ешқандай негіз жоқ екенін айтып ақталған. Алайда бұл сөздер ер адамның есінде қалып қойып, жылдар бойы әйелін кінәлап келеді.

Осы жылы мамыр айында ер адам 6 күн қатарынан ішімдікке сылқия тояды. Ол таңға жақын мас оянып, жанында ұйықтап жатқан әйелін көріп, қызғаныштан оны өлтірмекші болады.

Сейфтен өз атына тіркелген аңшы мылтығын алып, оқтап, әйелін екі рет атып жібереді. Әйелі сол жерде жан тапсырды. Кейін ер адамның өзі полицияға қоңырау шалып, жасаған ісін мойындаған. 

Ер адам 15 жылға бас бостандығынан айырылды. 

Айта кетейік, Атырауда төбелескен кәмелеттік жасқа толмаған қыздардың ата-анасы жауапқа тартылады.