Атырауда төбелескен кәмелеттік жасқа толмаған қыздардың ата-анасы жауапқа тартылады

Әлеуметтік желіде Атыраудағы кәмелеттік жасқа толмаған екі қыздың төбелескені түскен бейнеролик тарады, деп хабарлайды Orda.kz.

Бейнероликте бір қыз екінші қызды ұрып жатқанын көруге болады. Ал куәгерлер араша түспей, түсіріп тұрғанын да байқаймыз.

Полиция департаменті екі қыз да колледж студенті екенін мәлімдеді. Қазір осы іс бойынша тергеу жұмыстары жүргізіліп жатыр.

«Күдікті кәмелетке толмағандар бейімдеу орталығына орналастырылды. Барлық қатысушылар профилактикалық есепке алынады, материалдар кәмелетке толмағандардың істері жөніндегі комиссияға жіберіледі. Балаларды тәрбиелеу жөніндегі міндеттерді тиісінше орындамағаны үшін кәмелетке толмағандардың ата-аналары әкімшілік жауапкершілікке тартылады», деп мәлімдеді полиция департаменті.

Сондай-ақ, департамент  жанжалды бейнежазбаға түсіріп, оны әлеуметтік желіге таратқан жасөспіріммен де  жұмыс жүргізілетінін мәлімдеді. Атырау облысының білім басқармалары зардап шеккен қызды дәрігерлер тексеріп, ем тағайындап, үйіне жібергенін хабарлады. Оған психологиялық көмек көрсетіледі.

Еске сала кетейік, Атырауда ер адам алаңқайда ойнап жүрген баланы себепсіз ұрып тастады. Оқиға 23 қыркүйек күні Атырау қаласындағы ойын алаңқайының бірінде болған. Кейін ол ұсталып, оның 21 жаста екені анықталды. Сондай-ақ Атырау қаласында алғаш рет «Сталкиң» бойынша қылмыстық іс тіркелді.