Атырауда 2 қызының көзінше әйелін өлтірген ер адамға үкім шықты

Биыл 19 тамызда Атыраудағы тұрғын үйлердің бірінде күйеуі әйелін ұрып-соғып өлтірді. Әйелдің жасы 39-да еді. Марқұмның артында екі кішкентай қызы қалды, деп хабарлайды Orda.kz. 

Марқұм Ләззаттың туыстарының айтуынша, қайғылы оқиға болған күні күйеуі Тимур Кабдрахитов оны әдеттегідей  ұрып-соға бастаған. Аяусыз соққының бірі әйелдің желкесіне тиген. Дәл осы жарақат оның өліміне себеп болған. Қайғылы жайт 6 және 12 жастағы қыздарының көз алдында болған. Ләззат күйеуімен 14 жыл бірге отандасқан екен. 

«НеМолчи.kz» қорының мәліметінше, сот Тимур Кабдрахитовты кісі өлтірді деп танып, 10 жылға бас бостандығынан айырды. Алайда құқық қорғаушылар бұл жазаны тым жеңіл деп есептейді. Олардың айтуынша, сот әкенің өз балаларына келтірген психологиялық зардабын ескермеген. Сондай-ақ, сотталушы жедел жәрдем шақырмай, алдымен әпкелеріне қоңырау шалғаны да назардан тыс қалған.

Қазір екі қыз бала аналарының өлімінен кейін кәмелетке толмағандарды бейімдеу орталығына орналастырылды. Ләззаттың анасы зағип жан болса да өзге жақындары балаларды асырап алуға ниет білдірмеген.

Айта кетейік, Атыраудағы Яна Легкодимованы қатыгездікпен өлтіру ісі бойынша өмір бойына бас бостандығынан айырылған екі сотталушы үкімге апелляциялық шағым түсірді. Олардың қорғаушылары өмір бойына кесілген жазаны жеңіл жазаға ауыстыруды сұрап отыр.