Атбасарда жеңіл көлік 4 адамды қағып кетті

Mercedes жол жиегінде тұрған жаяу жүргіншілерді қағып кетті, деп хабарлайды Orda.kz Nayza Kokshe инстаграм-паблигіне сілтеме жасай отырып.

Көлік дөңгелегінің астында екі ересек адам мен екі бала қалды. Олар осы жол-көлік оқиғасы болған шағын ауданның тұрғындары.

«Барлық зардап шеккендер аудандық ауруханаға жеткізілді, оларға медициналық көмек көрсетіліп жатыр» деп жазылған хабарламада.

Бейнежазба: Instagram nayzakokshe

Зардап шеккендер арасындағы бас жарақатын алған алты жасар бала жансақтау бөлімінде жатыр.

Ақмола облысы полиция департаментінің баспасөз қызметі жазбаның астындағы түсініктемелерінде 12 сәуірде Атбасарда жол-көлік оқиғасы болғанын растады.

«Жол-көлік оқиғасы салдарынан түрлі жарақаттармен төрт жаяу жүргінші медициналық мекемеге жатқызылды. Сотқа дейінгі тергеу жүргізіліп жатыр, нәтижесінде процессуалдық шешім қабылданады», деп хабарлады полиция қызметкерлері.

Жүргізушіге қарсы қылмыстық іс қозғалды.

Бұған дейін «Орда» 2 сәуірде Алматыда жүк көлігі жаяу жүргіншілер өткелінде жеті жасар қызды қағып кеткені туралы жазған болатын.

Бесінші сәуірде Қосшыда екі жасар сәби көлік дөңгелегінің астында қалып, мерт болды.