Астанада үй кезегінде тұрған жеті баласы бар ананың құқығы қорғалды

Астанада үй кезегінде тұрған көп балалы ананың кезегі заңсыз алып тасталғаны белгілі болды. Сот кейін оның құқығын қайта қалпына келтірді, деп хабарлайды Orda.kz.

Жоғарғы соттың мәліметінше, Астана қаласында «Алтын алқа» иегері,  7 баланың анасын үй кезегінен заңсыз алып тастаған. 

Әйел 2009 жылдан бері үй кезегінде мемлекеттік қызметкер және көп балалы ана ретінде тұрған. Оның күйеуі немесе туысында жылжымайтын мүлік болғандығы анықталып, оны кезектен алып тастаған. Әйелге қалалық тұрғын үй инспекциясы басқармасымен соттасуға тура келді.

«Бірінші және апелляциялық сатыдағы сот тұрғын үй инспекциясының әрекетін заңсыз деп танып, әйелді кезекке қайта тұрғызуға міндеттеді. Әкімшілік істер жөніндегі кассациялық сот бұл шешімдердің заңдылығын растады», – деп мәлімдеді Жоғарғы сот. 

Сондай-ақ Жоғарғы сот мұқтаж деп танылған және белгіленген тәртіппен тұрғын үй кезегіне қойылған аналарды кезектен шығаруға болмайтынын атап өтті.

Еске сала кетейік, Мәсімовтің қызы бұрынғы күйеуіне зәулім сарайды беруге мәжбүр болды