«Аяғым қайда?»: Автобус апатынан соң аяғынан айырылған қыздың жағдай белгілі болды

Астанада болған автобус апаты салдарынан қос аяғынан айырылған қыздың ағасы оның қазіргі жағдайы туралы мәлімет берді. Зардап шеккен қыз қазір аяғын іздеп жылап жатқан көрінеді, деп хабарлайды Orda.kz. 

Бүлдіршіннің ағасы қыздың жағдай жақсы емес екенін, күндіз-түні аяғын сұрап жылайтынын айтты. Сонымен қатар Алуа өзін ауруханадан алып кетуді сұрайды екен.

Балалар омбудсмені Динара Зәкиева ауруханаға барып, қыздың жағдайын біліп қайтқан. Ол оқушының анасымен бірге оңалту және протездеу мәселелерін талқылады.

Еске сала кетейік, 2 маусым күні кешке таман Астанада жолаушылар автобусы «Самал» ықшамауданының маңында бағанға соғылды. Апаттан 15 адам жарақат алып, бір бүлдіршін қос аяғынан айырылды.

Сонымен қатар, зардап шеккендер «Еуразия» СҚ бөлімінен өтемақы алатыны мәлім болды. Оларға амбулаторлық немесе стационарлық емдеуге жұмсалатын шығын үшін кемінде 200 АЕК, яғни 786 мың теңге беріледі. Қазіргі таңда 15 адамның үшеуі ауруханада ауыр жағдайда жатыр. Ал қос аяғынан айырылған қызға 19,6 миллион теңге беріледі.