«Әскери қызметкер»: Түркістан облысында мүгедек жігітті өлтіргендердің бірі ұсталды

Түркістан облысының Сарыағаш ауданында 19 жастағы мүгедек жігітті аяусыз соққыға жығып, пышақтап өлтірген бір топ жігіттің бірі ұсталды, деп хабарлайды Orda.kz.

Осы қылмысқа қатысы бар деген күдікпен әскери бөлімнің қызметкері ұсталды. Оңтүстік өңірлік әскери тергеу басқармасы қасақана адам өлтіру бойынша қылмыстық іс қозғады. Күдікті 2 айға қамауға алынды. Сотқа дейінгі тергеу жалғасып жатыр.

Еске салайық, бұған дейін Түркістан облысы, Сарыағаш қаласында мүгедек жігітті бір топ жастар пышақтап өлтіргенін хабарлаған едік. 2- топтағы мүгедектігі бар 19 жастағы Жасұлан Әбдіманапты ауыл бұзақылары адам аяғы баспайтын жерге апарып, 14 жерінен пышақтап кеткен. Оқиға 20 ақпан күні болған. Ал Жасұланның мәйітін ауыл шопаны араға екі күн салып, 22 ақпан күні байқап, полицияға хабар берген екен. 

Марқұмның анасы бір топ жігіт баласының атынан несие алғанын айтты. Жігіттер марқұмды «280 мың теңгеңді төлеп береміз» деп алып кеткен көрінеді.