Ардагер журналист Кәкен Қамзин алаяқтың арбауына қалай түскенін айтып берді

Алматыда белгілі журналист, профессор Кәкен Қамзин алаяқтарға алданып баспанасынан айырылды. Ол әлеуметтік желідегі парақшасында оқиғаның қалай болғанын баяндады, деп хабарлайды Orda.kz.

Журналист Facebook парақшасында өзгелерге сабақ болу үшін жазба жариялағанын айтты. Алаяқтардың алғашқы іс-әрекеті 12 маусым күні басталған екен. Таңертең профессорға «қалалық энергожүйесінен» бір әйел қоңырау шалады. Ол үйдегі электр есептегіштердің ескіргенін, соны жедел ауыстыру керегін ескертеді. Кейін жеке куәлігіндегі мәліметтерді сұрастырады. 

 Ол деректерін бергеннен соң, артынша «қаржы бақылау департаментінің» қызметкерімін деп тағы бір адам хабарласады.

Кәкен Қамзиннің айтуынша, бұл адамнан кейін өзін «ҰҚК майорымын» деп таныстырған Мальтиев деген адам бейнетелефон шалған. Ол барлығын өзі бақылауында ұстайтынын айтыпты.

Профессор бәрі осы қоңыраудан кейін басталғанын айтады. Алаяқтар Кәкен Қамзинге «мықты адвокат» деп Абай деген жігітті ұсынады. Олар хат алмасып, сөйлесіп тұрады. Журналист арада телефон арқылы гипноз жасаған болуы мүмкін екенін айтты. Себебі жайшылықта қария бір банк картасынан екінші банктің картасына қаражат жібере алмай, қызының көмегіне жүгінеді екен. Ал бұл жерде бүкіл ақшаны өзі шешіп берген. 

Профессор олар көрсеткен мекен-жайларға барып, бірнеше терминалдан қаражат жіберіп отырған. 

«Одан кейін, ертеңінде ғой деймін, сіздің есебіңіздегі ақшаға қауіп төніп тұр. Соны Халық банктен шешіп алыңыз, біз курьер жібереміз, ол да «Ұлттық банктің» есебіне түседі, ақшаңыз ешқайда кетпейді деп сендірді. Содан соң қорымдағы бес миллион теңгені шешіп алып курьерге беріппін. Курьермен кездесу сағат төрттер мөлшерінде Әуезов көшесі мен Абай даңғылындағы Халық банктің алдында өтті. Курьердің суретін түсіріп алдым, ар жағымда бір күдік жылт етті ме, кім білсін. Бірақ кешкі сегіздер мөлшерінде (қателесуім де мүмкін) ақшаның «Ұлттық банк» есебіне түскені туралы мәлімет келді. Имандай сендім», — дейді Кәкен мырза.  

Алаяқтар мұнымен тоқтамай, алдауын жалғастыра берген. Олар қарияны үйін нотариус арқылы нарықтық бағадан төмен қаржыға сатуға көндірген. Кәкен Қамзин үйін 26 маусымда 31 миллион теңгеге нотариус арқылы сатқан. Одан кейін екі кибералаяқтың нұсқауы бойынша ақшаны курьермен «ҰҚК-ның айтқан орнына» жөнелткен. Олар бір-екі сағаттан кейін ақшаның «Ұлттық банктің» есебіне түскенін хабарлап, түбіртектің көшірмесін жібереді.

Журналист алданғанын 4 шілдеде ғана білген. Дереу шәкірттеріне хабарласып, мән-жайды айтқан. 

Айта кетейік, Orda.kz Әл-Фараби атындағы Қазақ ұлттық университетінің бірінші курс студентінің ректорат ғимаратының 14-қабатынан секіріп, көз жұмғаны жайлы жазды.