«Арбаға таңылған өмір»: Қайыршы әйелдің қиын тағдыры

Баян Жолдасова «Qazaq airan» YouTube арнасында өткен өмірінен сыр шертті, деп хабарлайды Orda.kz.

Арбаға таңылған әйел қайыршылықпен күнелтуге мәжбүр. Жататын орнына күнделікті 6 мың теңге төлейді. Ал ол ақшаны елден жинайды. Арзан пәтер суық болғандықтан денсаулығына зиян екенін айтты. 

Баян Жолдасова ата-анасының қаталдығына налиды. Айтуынша, ата-анасы оны өмірге әкелгендеріне өкінеді екен. Жалғыз қызды алақанға салудың орнына, қарғыс айтып, балағаттаған. Оқиға белгісіз бойжеткенді ауылдағы 4 жігіттің зорлағанынан басталған. Айқай-шу болып, зорлағандардың ішінде біреуі үйленуге бел байлаған. Тұрмыс құрғаннан кейін Баян жүкті екенін білді. Бірақ құрсағындағы сәбиге деген аналық махаббаты болмады. Ол тіпті, кімнің баласы екенін білмеді. Баланы босанғаннан кейін перзентханада тастап кетуге бекінген. Бірақ жүрегі дауаламай, баланы өзінің анасына апарып берген. 

Кейін тағдырына налыған 18 жастағы қыз қалаға келіп, құрылыста жұмыс істейді. Тағы бір ер адаммен көңіл жарастырады. Ұл босанады. Ұлы өсе келе лудоман болып шығады. Кейін ұлы аяқ астынан қайтыс болып, оның бар қарызы Баянның мойнына ілінеді.

Бірақ Баян Жолдасова қарыздың бәрінен құтылғанын, сол үшін үйін сатқанын жасырмады. Кейін әйел қайғысын ұмыту үшін 4 жыл бойы ішіп кеткен. Таныстары үйден қуып шығатын жағдайға жеткен.  Тағдырдың қиындығына налыған әйел қолында бір тиын ақшасы болмай, көшеде бір әйелден мың теңге сұраған. Сол кезде бейтаныс әйел Баянды қайыршы болуға үйретіпті. 

Дегенмен Баян үшін тағдырдың тосын сыйы таусылмапты. Қайыршылықпен күнелткен әйел рак ауруына шалдығады. Қазір емделіп жүр екен. 

Баян өзі қанша тағдыр тауқыметін көріп жүрсе де, қиындыққа мойымай өмір сүру керегін, барлық мәселенің шешілетін жолы бар екенін айтады.