Апелляциялық сот: Шерзат Полаттың ісін қарауға БАҚ өкілдері кіре алмады

Алматы облыстық сотында Шерзат Полаттың ісі бойынша бірінші сатыдағы соттың үкіміне қатысты 8 сотталушыдан түскен апелляциялық шағым қаралып жатыр, деп хабарлайды Orda.kz.

Апелляциялық шағымға төрағалық етіп Досымбек Қалдарбек есімді судья қарап жатыр. Алматы облыстық соты ақпарат тарату үшін журналистерге бөлек бөлме дайындағанымен сот залындағы процесті бақылау мүмкін болмады. Сол арадағы БАҚ-қа жасалған трансляцияның дыбысының нашарлығына байланысты ешқандай ақпарат ала алмадық. Сонымен қатар, сот залына кірген операторларды да шығарып тастады. Оған сотталғандардың ата-анасы мен адвокаттарының қарсылығы себеп болды.  Сот ашық деп хабарланғанымен, ашық процеске журналистер кіре алмай отыр. 

Сотта сөз алған сотталғандардың жақындары алдыңғы сот отырыстарының біржақты өткенін айтты. Сондай-ақ сот шешімімен шыққан азаматтық талап-арызға да разы емес екенін жеткізді.

Айта кетейік, бүгінгі сотта куәгерлер Жақсыгелді Дана, Эльмира Нұрбекова, Юлдаш Розбакиев пен Қазыкенов Арланға қатысты шыққан жеке қаулы да қаралады.