«Антикор ұстағаннан кейін»: Іле ауданына жаңа әкім тағайындалды

Алматы облысы Іле ауданының жаңа басшысы Қайыржан Жақсымбетов тағайындалды. Ол облыс әкімінің өкімімен және Президент Әкімшілігінің келісімімен қызметке кірісті, деп хабарлайды Orda.kz.

Еске салсақ, Іле ауданының бұрынғы әкімі Бағдат Қарасаевты  шілде айында Антикордың өңірлік филиалы қызметкерлері ұстаған еді. Оған лауазымдық өкілеттіктерін асыра пайдаланды және қызметтік өкілеттігін теріс қолданды деген айып тақты. Сондай-ақ оның кабинетінде тінту жұмыстары жүргізілген болатын.

Ал Қайыржан Жақсымбетов — 1975 жылы Жамбыл облысы Мойынқұм ауданында дүниеге келген. 1997 жылы Қазақ мемлекеттік сәулет-құрылыс академиясын «өндірістік және азаматтық құрылыс» мамандығы бойынша тәмамдаған. 2004 жылы Қазақ ұлттық аграрлық университетінен «құқықтану» мамандығы бойынша диплом алған.

Еңбек жолын Жамбыл облысында «Жамбылагропромстрой» АҚ құрылыс учаскесінің бригадирі болып бастаған.

Бұған дейін мына лауазымдарда қызмет атқарған:

• Жамбыл облысы Тараз қаласында «Сарыарқа» ауылшаруашылық кәсіпорнының вице-президенті;
• Алматы архитектуралық-құрылыс бақылау басқармасында ғимараттарды қайта құру және қайта жоспарлау бойынша мемлекеттік архитектуралық-құрылыс бақылау бөлімінің бас маманы және басшысы;
• Алматы мемлекеттік архитектуралық-құрылыс бақылау және лицензиялау департаменті директорының орынбасары және бастығы;
• Алматы Алатау ауданы әкімінің орынбасары;
• Балқаш-Алакөл бассейндік инспекциясы басшысының орынбасары; 
• Алматы облысының мемлекеттік архитектуралық-құрылыс бақылау басқармасының басшысы.