АМӨЗ шығарындыларды асыра пайдалану бойынша соттан ұтылды

Атырау мұнай өңдеу зауыты (АМӨЗ) ластаушы заттар шығарындылары нормативтерін арттырғаны туралы іс бойынша сот талқылауында жеңіліп қалды, деп хабарлайды Orda.kz.

Бұған дейін Атырау облысы бойынша Экология департаменті кәсіпорында шығарындылардың асып кету фактілерін анықтаған болатын. АМӨЗ-ға қатысты ҚР Әкімшілік құқық бұзушылық туралы кодексінің 328-бабының 3-бөлігі бойынша әкімшілік іс қозғалды.

29 шілдеде Атырау қаласының мамандандырылған әкімшілік соты кәсіпорынды кінәлі деп танып, 28 020 324 теңге айыппұл салды.

Бірақ АМӨЗ бірінші сатыдағы соттың шешімімен келіспеді және апелляция берді. Алайда кәсіпорынға шағымды қанағаттандырудан бас тартылды.

Қаулы заңды күшіне енді және АМӨЗ экологиялық заңнаманы бұзғаны үшін 28 миллион теңгеден астам айыппұл төлеуге міндетті. Қазір өндіріп алу кезеңі жүріп жатыр.

Біз бұған дейін ҚМГ АМӨЗ жұмысын  тексеру үшін жұмыс тобын құрғанын хабарладық.  Жыл басында Атырау мұнай өңдеу зауытының  қызметкері бастығының қысымына шыдамай,  қарнын жарып тастаған болатын.