Болат Назарбаевтың серіктестеріне халықаралық іздеу жарияланды

Ішкі істер министрлігі Данияр Әбдіғапаров пен Қанат Алмабекке халықаралық іздеу жариялады, деп хабарлайды Orda.kz. 

Бұл екі тұлғаның аты-жөні мен суреті құқықтық статистика және арнайы есепке алу органдары порталындағы «қылмыскерлерді іздестіру» бөлімінде тұр.

Екі жыл бұрын Алматы облысының полиция департаменті Данияр Әбдіғапаров пен Қанат Алмабекке, тағы Жұмадин Патов пен Айдос Нұрқалиевке халықаралық іздеу жариялаған болатын. Shishkin like Telegram арнасының мәліметінше, ол жерде Қанат Алмабектің тегі Жақаев деп көрсетілген. Төртеуі де аса ірі мөлшерде алаяқтық жасады деген күдікке ілінген. Прокурорлар күдіктілердің бұрынғы «Алтын Орда» басшылығының мүшелері болғанын және оларды іздестіру базар сатушыларының шағымына қатысты екенін атап өткен еді. Сатушылар павильоннан сауда орындарын алу үшін бұрынғы әкімшілікке қомақты қаражат төлегендерін айтады. Алайда ғимарат соңына дейін аяқталмай, адамдар орынсыз және ақшасыз қалған.

Ал қайта халықаралық іздеу жариялаудың себептері әлі айтылмады. 

Айта кетейік, «Алтын Орда» базары шулы, даулы істерімен белгілі. Екі мыңыншы жылдардың басынан бастап қылмыстар, жанжалдар көп болған. Кейін оны тұңғыш президенттің інісі Болат Назарбаев иеленгенін де БАҚ жарыса жазған болатын.

Алтын орда базары Қазақстанның тұңғыш президенті Нұрсұлтан Назарбаевтың інісі Болат Назарбаев басқаратын «KURYLYS LTD» компаниясына тиесілі екені қаңтар оқиғасынан кейін ғана белгілі болды. Басып алу, есірткімен ұсталу, алаяқтық сияқты түрлі қылмыстардың ордасына айналған базардың Youtube арнасындағы бейнежазбаларына қарасақ, қазіргі басшылары қайырымдылықпен айналысатын, атымтай-жомарт адамдар екен.

Orda.kz тілшілері базарға барып, мән-жайды анықтап қайтқан еді.