Үкімет Арқалықты құтқару үшін 250 млн теңге бөлді

Үкімет Арқалық қаласының жылу желілерін жаңғыртып, қайта жөндеуге қаржы бөлді, деп хабарлайды Orda.kz.

Қостанай облысындағы Арқалық қаласының жылу желілеріндегі жөндеу жұмыстарын аяқтау үшін үкімет резервінен шамамен 250 миллион теңге бөлінді. Тиісті қаулыға ҚР Премьер-министрі Олжас Бектенов қол қойды.

«Арқалық ЖЭО 375 ғимаратқа қызмет көрсетеді және коммуникациялардың тозуына байланысты жоғары тәуекел аймағындағы жылу көздерінің тізіміне енгізілген. Қаладағы жылу желілерінің жалпы ұзындығы – 34,7 км, оның көп бөлігі 1990 жылы пайдалануға берілген. Бүгінде тозу деңгейі орта есеппен 48 пайызды, ал кейбір учаскелерде 82 пайызға дейін жетеді. Бұл жылу беру маусымында 24–29 пайызға дейінгі энергия шығынына алып келеді» деп жазылған үкімет хабарламасында. 

2023 жылдан бері қалада жылу көздерін реконструкциялаудың екінші кезеңі жүзеге асырылып жатыр. Бүгінгі таңда 17 шақырым жылу желісі ауыстырылды. 2025 жылы тағы 9,9 шақырым желіні жаңарту жоспарланған. Жұмыстар кезең-кезеңімен жүргізілуде. Жоба толық аяқталған соң, жалпы тозу деңгейі 12 пайызға төмендейді деп күтілуде.

Қазіргі таңда Арқалықта 38,4 мың адам тұрады.