Алматылық жас ғалым инсультті ерте анықтаудың жолын тапты

Қазақ ұлттық университетінің зерттеушісі Ажар Тұрсынова жасанды интеллект көмегімен инсультті алдын ала анықтайтын жүйе әзірледі, деп хабарлайды Orda.kz.       

Ғалымның айтуынша, инсультті әдеттегі диагностикалау көп уақыт пен қымбат жабдықты қажет етеді. Дәрігерлер медициналық кескіндерді қолмен талдайды, ал белгілер айқын болмаған жағдайда қате кетуі мүмкін.

«Бүгінде инсульт – жаһандық денсаулық сақтау мәселесіне айналған. Оны анықтаудың түрлі әдістері бар, алайда бұл процесс әлі де күрделі және уақытты көп алады… Біздің жасанды интеллектті қолданатын әдісіміз инсультті жылдам әрі дәл диагностикалауға, медициналық кескіндерді нақты талдап, түсіндіруге мүмкіндік береді, бұл инсультті анықтау кезінде уақытты едәуір үнемдейді», – дейді Ажар Тұрсынова. 

Жобаға патент алынған, ал зерттеу нәтижелері ғылыми журналдарда жарияланды. Болашақта Ажар өз әзірлемесін қазақстандық клиникаларға енгізуді жоспарлап отыр, бұл дәрігерлерге пациенттерге жедел көмек көрсетуге мүмкіндік береді.

Бұған дейін Қазақстанда ерлер арасында инсульттің алдын алу үшін скрининг жүргізу басталғаны хабарланған болатын. 

2021 жылы Алматыда №7 клиникалық ауруханада ишемиялық инсультпен ауыратын науқасқа  «Церебра» инновациялық бағдарламасын қолданып ота жасалды.