Инсультты ерте анықтауға арналған рентгенологиялық бағдарлама енгізілді

Алматыда №7 клиникалық ауруханада ишемиялық инсультпен ауыратын науқасқа «Церебра» инновациялық бағдарламасын қолданып ота жасалды, деп хабарлайды аурухана бөлімі.

Инновациялық жобаны алматылық ІТ-мамандар тобы құрды.

«Алматыда №7 қалалық клиникалық ауруханада жасанды интеллект көмегімен инсультты ерте анықтауға арналған рентгенологиялық бағдарлама енгізілді. Бұл тек Қазақстанда ғана емес, бұрынғы ТМД аумағында тұңғыш рет жасалып отыр. Алдымен науқас компьютерлік томографияға түседі. Артынша Cerebra бағдарламалық жасақтамасында өңдеуден өтеді», - делінген хабарламада.

Бірегей ота жасалған пациент жедел көмекке келгенде оның сол жақ аяқ-қолдары мүлдем қозғалмайтын.

«Ол Церебра бағдарламасы арқылы мәліметтерді өңдейтін компьютерлік томографиядан өтті. Мидың оң жақ ортаңғы ми артериясына шұғыл механикалық тромбоэкстракция жасалды. Операциядан кейінгі кезеңде науқас толық есін біледі. Аяғының қозғалыстары толық қалпына келді. Ал қолында әлі де әлсіздік . Науқас оңалтуға дайындалып жатыр», - деді №7 Қалалық клиникалық аурухананың қан тамырлары нейрохирургиясы бөлімінің меңгерушісі Рауан Қастей.

Ол инсульттен кейінгі церебральды қан айналымы 4-5 сағат ішінде қалпына келетіндігін айтты.

Дәрігерлердің айтуынша, автоматтандырылған платформа 5-10 минут ішінде инсульт қаупін анықтайды және ми қан тамырларындағы өзгерістерді тез есептейді.

«Мұндай клиникалық диагностикалық бағдарлама инсультті ерте сатысында анықтауға, ишемиялық зақымдану аймағын бірден тануға, терапевтік терезенің нақты уақытын есептеуге, хирургия немесе тромболитикалық терапияға көрсеткіштер мен қарсы көрсеткіштерді анықтауға және инсультпен ауыратын науқастарды диагностикалау мен емдеуде қажет басқа да көптеген функцияларды жүзеге асыруға мүмкіндік береді», - деп атап өтті аурухана қызметкерлері.