Алматыдан Ташкентке жүрдек пойыз қатынайды

Өзбекстан мен Қазақстан Алматы мен Ташкент арасында аптасына үш рет қатынайтын жүрдек  пойызды  іске қосады. Бұл туралы «Өзбекстан темір жолдары» компаниясының телеграм-каналы хабарлады.

2022 жылдың 2 мамырынан бастап Алматы-2 – Ташкент – Алматы-2 (Тальго-Тұлпар) бағытымен аптасына үш рет №1/2 тұрақты жылдам пойызы ұйымдастырылады.

 «Ташкент-Орталық» теміржол вокзалынан Қазақстанға бұл пойыз сейсенбі, бейсенбі және жексенбі күндері жолға шығады. Ал «Алматы-2» теміржол вокзалынан Өзбекстанға – дүйсенбі, сәрсенбі және сенбі күндері жүреді.

Сонымен қатар, 1 сәуірден бастап Өзбекстаннан Қазақстанға ағымдағы жылғы алғашқы тұрақты жолаушылар пойызы: Нөкіс – Бейнеу – Нөкіс қатынай бастайды.

Пойыз Нөкіс стансасынан сейсенбі, жұма және жексенбі күндері, Бейнеу стансасынан – дүйсенбі, сәрсенбі және сенбі күндері жолға шығады.

Компания екі жылдан кейін елдер жолаушылар пойыздары үшін шекараларды біртіндеп аша бастағанын атап өтті.