Алматыдағы тергеу абақтысында судья қайтыс болды

Алматы қаласындағы тергеу изоляторында судья көз жұмды. Ол бұған дейін сыбайлас жемқорлық және алаяқтық күдігімен ұсталған болатын, деп хабарлады Orda.kz.       

Қайтыс болған азамат — мамандандырылған әкімшілік құқықбұзушылықтар жөніндегі ауданаралық соттың судьясы. Оның өлімі туралы ақпаратты Қылмыстық-атқару жүйесі комитетінің (ҚАЖК) баспасөз қызметі растады, бірақ есім-сойы нақты аталмады.

«Тергеу изоляторында қамауда отырған ер адам кенеттен көз жұмды. Алдын ала мәлімет бойынша, өлімнің себебі — жүректің тоқтауы. Бұл жайт бейнебақылау камерасына тіркелген» деп жазылған ҚАЖК хабарламасында. 

Қазіргі уақытта тексеріс жүргізіліп жатыр, ал сот-медициналық сараптама мен қызметтік тексеріс нәтижелері кейінірек жарияланады.

Айта кетейік, бұған дейін – 2024 жылғы 30 қазанда, Алматыда аталған судьяға қатысты ҚР Қылмыстық кодексінің 366-бабы (пара алу) және 190-бабы (алаяқтық) бойынша ҚР ҰҚК тергеу жүргізіп жатқаны хабарланған болатын. Тергеу мүддесіне байланысты толық ақпарат ол кезде де жария етілмеген.

Еске салсақ, Берденовтің сотында судья журналистке тілін шығарып, бір-ақ күнде танымал болған еді. 

Сонымен қатар шетелде қашып жүрген Байбектің әйелінің құрбысы,  бұрынғы судья Светлана Жолманова 10 жылға сотталды.