Алматыдағы оқу орны студент қыздарына ұяң болуды, ер азаматтарға иіліп сәлем беруді үйретіп жатыр

Абай атындағы Қазақ ұлттық педагогикалық университетінде бірінші курста оқитын студент қыздармен жабық кездесу өткізіліп, оларға ер адамдардан келген «тәрбие сабақтары» жазылған бейнеролик көрсетілген. Қыздарға қалай киіну, қалай сөйлеу және ер азаматтармен қалай сәлемдесу керектігі түсіндірілген, деп хабарлайды Orda.kz.

Алматылық студенттердің шағымын Qumash паблигі жариялады. Олардың айтуынша, аудиторияға шамамен 40–50 бірінші курс студенті жиналған. Ерекше жиын алдында қабырғаларға қыздарды ұяң болуға үндейтін постерлер ілінген, кейін бейнеролик көрсетілген. Видеода әртүрлі жастағы ер адамдар қыздардың өзін қалай ұстауы керек деген пікірлерімен бөліскен.

Аға оқытушылардың бірі тіпті шектен шығып, Еуропада «әйелдер еркіндігі шамадан тыс болғандықтан» ЛГБТ сияқты қоғамдастықтар мен басқа да құбылыстар кең таралған деген пікір айтқан.
Куәгерлердің сөзінше, жиын біткенше аудиториядан ешкімге шығуға рұқсат берілмеген.

Кейінірек университет бұл жағдайға қатысты пікір білдіріп, кездесудің «ұлттық құндылықтар мен Абай Құнанбайұлының тәрбие философиясын» насихаттауға бағытталған тәрбиелік бағдарламаның бір бөлігі өткенін мәлімдеді. Ресми жауапта бұған дейін мұндай іс-шаралар сынға ұшырамағаны айтылған:

«Кездесу барысында көрсетілген бейнематериалды студенттер әртүрлі қабылдап, қатысушылар арасында пікірталас туды. Университет әкімшілігі бұл жағдайды түсіністікпен қабылдайды және болашақта осындай мазмұндағы материалдарды таңдауда барынша мұқият болатынын мәлімдейді».

Сонымен қатар, ҚазҰПУ берген жауабында өздерінің зайырлы оқу орны екенін, студенттердің еркіндігіне, жеке таңдауына және пікір алуандығына құрметпен қарайтындарын ерекше атап өткен.

Еске сала кетейік, продюсер Баян Есентайқызы Orda News YouTube арнасына сәлем салудың өзіне жабайы болып көрінгенін айтқан болатын.