Алматыда жол бойында өсіп тұрған ағаш автокөліктің үстіне құлады

Алматыда өсіп тұрған ағаш жолдың жүріс бөлігіне құлап, тұрақта тұрған жеңіл автокөлікті зақымдады, деп хабарлайды Orda.kz.       

Оқиға куәгерлердің айтуынша, сенбі күні Шәріпов көшесінде болған. Оқиға орнынан түсірілген фотосуреттерде ағаштың Honda Civic автокөлігінің төбесін жапырып тастағаны көрінеді. Зардап шеккендер жоқ.

Алматы әкімдігі оқиғаға қатысты түсініктеме беріп, құлаған теректе бұған дейін «сыртқы белгілерінде апаттық жағдайдың болмағанын» мәлімдеді.

«Қаладағы қатты жауын-шашын салдарынан топырақ шамадан тыс ылғалданып, жұмсарған, бұл ағашты ұстап тұған тамырына әсер ететіні белгілі. Әлсіреген тамыр ағаштың салмағына төтеп бере алмай, нәтижесінде ағаш жолға және жанында тұрған көлікке құлаған» деп жазылған хабарламада

Әкімдік сондай-ақ «құлаған ағаш жолдан алынып, кесіліп, басқа жаққа апарылды, автокөлік қозғалысы қалпына келтірілді» деп атап өтті.

Зақымдалған көлік иесіне келтірілген шығын өтеле ме, жоқ па, ол әзірге нақтыланбады.

Оқи отырыңыз:

• Алматыда алып ағаш көшенің қақ ортасына құлап түсті
• Алматыда нөсер жауын салдарынан сегіз ағаш құлады
• Қонаевта қатты дауыл соғып, шатырлар ұшып, ағаштар құлады