Алматыда қоқыс алаңынан сегіз иттің терісі сыпырылған өлексеcі табылды

Алматының Алатау ауданында тұрғындар қоқыс алаңынан жануарлардың бөлшектелген қалдықтарын тауып алды, деп хабарлайды Orda.kz.

Куәгерлердің айтуынша, бұл жерден терісі сыпырылған сегіз иттің өлексесі табылған. Сонымен қатар тұрғындар сол маңнан түлкінің бастары, биологиялық қалдықтарға толы қаптар мен көп мөлшердегі аң терісін көргендерін айтады. Сыртқы белгілеріне қарағанда, жануарлар арнайы бөлшектелген болуы мүмкін.

Оқиға орнында көлік іздері байқалған. Тұрғындардың болжамынша, жануарлардың қалдықтары бұл жерге көлікпен әкелініп тасталған болуы ықтимал.

Оқиға туралы хабардан кейін полиция қызметкерлері келіп, табылған жануар қалдықтарын алып кеткен. Алматы қалалық полиция департаментінің мәліметінше, аталған дерек бойынша Алатау аудандық полиция басқармасы қылмыстық іс қозғаған.

Қазіргі уақытта тәртіп сақшылары оқиғаның барлық мән-жайын анықтауға бағытталған жедел-іздестіру және тергеу шараларын жүргізіп жатыр. Оқиға орны мұқият тексеріліп, мүмкін куәгерлерден жауап алынуда, сондай-ақ бұл іске қатысы болуы мүмкін тұлғаларды анықтау жұмыстары жүргізілуде.

Оқи отырыңыз:

• Америкалықтар асырап алған ер адам Қазақстандағы ата-анасына іздеу салды
• Михаил Шайдоров ISU сыйлығына үміткер атанды