Алматыда қаржы полициясының бұрынғы қызметкерлеріне үкім шықты

Алматыда сот қаржы полициясының бұрынғы қызметкерлері Кенжебай Жұмабеков пен Дәурен Есімбековті «азаптау» қылмысы бойынша кінәлі деп таныды, деп хабарлайды Orda.kz.

Мамандандырылған қылмыстық істер жөніндегі ауданаралық сот оларды алдын ала сөз байласу арқылы және бірнеше рет азаптау (ҚК 141-1-бабы 2-бөлігінің «а, б» тармақтары) қылмысы үшін кінәлі деп таныды.

Екеуіне де үш жыл бойы мемлекеттік қызмет атқаруға тыйым салынды. Үкім заңды күшіне енген жоқ.

Істегі жәбірленушілердің нақты саны ҚПК-нің 29-бабына сәйкес жарияланбай отыр.

Сотталғандар атышулы «Қожамжаровтың» адамдарына қатысты іске байланысты. Бұл — бұрынғы бас прокурор Қайрат Қожамжаровтың айналасында болған шенеуніктер. Соңғы айларда олардың біразына қатысты қылмыстық істер қозғалды.

Қазіргі уақытта сыбайлас жемқорлыққа қарсы ұлттық бюроның бұрынғы басшысы Талғат Татубаев, Бас прокуратураның арнайы прокурорлар қызметінің бұрынғы басшысы Олеся Кексель және бұрынғы қаржы полициясының агенті Талғат Махатов тергеліп жатыр. Махатов бұған дейін «Қорғас ісі» бойынша басты куәгер Медет Жамашевті өлтіру үшін қастандық ұйымдастырғаны үшін ұзақ мерзімге сотталған.

Ал 23 қыркүйекте оның бұрынғы орынбасары Мақсат Дүйсеновтің Германияда ұсталғаны белгілі болды. Қайрат Қожамжаровтың серігі — бұрынғы прокурор Мақсат Дүйсенов  Германиядан саяси баспана сұраған. Неміс билігі мардымды дерек берудің орнына істің құпия екенін алға тартады. Дегенмен Orda.kz-ке Мақсат Дүйсеновтің қолында Қазақстандағы беделді тұлғаларға әсер ететін деректер болуы мүмкін деген ақпарат түсті.