Алматыда екі жігіттің сөмкесін ашып қараған полицейлерге қатысты қызметтік тексеру басталды

Алматыда тұрғынның полиция қызметкерлерінің әрекетіне қатысты шағымынан кейін қызметтік тексеру басталды, деп хабарлайды Orda.kz. 

Ер адамның айтуынша, 17 тамызда сағат 20:42 шамасында ол досымен бірге Инженерная көшесінде такси күтіп тұрған. Сол кезде оларға екі полиция қызметкері жақындап, өздерін таныстырмастан беттеріне жарық түсіріп, қалталарындағы заттардың бәрін көрсетуді талап еткен.

Оның сөзінше, кейін тағы бір полиция қызметкері келіп, куәгерлердің қатысуынсыз және бейнетіркеусіз сөмкесін ақтара бастаған.

Алматы қаласының полиция департаменті 17 тамызда Медеу ауданында патрульдеу кезінде қызметкерлердің мінез-құлқы күдік тудырған екі азаматқа назар аударғанын растады. Осыдан кейін полиция оларды тексерген.

«Тексеру барысында тыйым салынған заттар мен құралдар анықталған жоқ, азаматтарға қатысты қандай да бір шара қолданылған жоқ»,  деп хабарлады Алматы ПД.

Сонымен қатар полиция қызметкерлері әрекетіне қатысты қызметтік тексеру тағайындалды. Оның қорытындысы бойынша тиісті шаралар қабылданады.

Оқи отырыңыз: 

• Башар Асадтың бауыры Сирияда өлім жазасына кесілді
• Қуат Хамитов Қазақстанда басшылық қызметке тағайындалды