Алматыда екі компанияның құрылысы уақытша тоқтатылды

Алматы қаласының әкімдігі екі құрылыс компаниясының тұрғын үй нысандарын салу жұмыстарын уақытша тоқтатты, деп хабарлайды Orda.kz.

«Бостандық ауданындағы Розыбақиев – Қатаев – Радостовец көшелері арасындағы аумақта құрылыс-монтаж жұмыстары жүргізілуде. Бұл жұмыстарды CAMH Realty және «ВЕК-Тұмар» компаниялары іске асырып жатыр. Дегенмен, нақты жоспарлау жобасына (НЖЖ) сәйкес, аталған аумақта мектеп салу қарастырылған. Осыған байланысты, білім беру нысаны үшін жер телімінің шекарасы нақтылағанға дейін кейбір тұрғын үй жобаларын жүзеге асыру кейінге шегерілді» деп жазылған Алматы қаласы әкімінің баспасөз қызметі таратқан хабарламада. 

Әкімдіктің мәліметінше, тұрғындармен, сондай-ақ CAMH Realty және «ВЕК-Тұмар» компанияларының өкілдерімен өткізілген кездесулер нәтижесінде құрылыс жұмыстарын жобалық құжаттамаға қажетті өзгерістер енгізіліп, жер телімінің шекарасы Алматы қаласының сәулет және қала құрылысы басқармасы тарапынан нақтыланғанға дейін уақытша тоқтату жөнінде келісімге қол жеткізілген.

«Алдағы уақытта барлық шешімдер қала тұрғындарының мүддесі мен қолданыстағы заңнама талаптарын ескере отырып қабылданады. Бұл мәселе Алматы қаласы әкімдігінің бақылауында»,  деп қосты әкімдік. 

Еске салсақ, Медеу ауданында «Жайлы мектеп» жобасы аясында салынып жатқан оқу орнына қатысты Алматы әкімі Bazis-A иесiне сенімді ақтамай отырғанын ескерткен болатын. 

Сонымен қатар Дархан Сатыбалды Алматыда мектептер, балабақшалар мен жолдардың құрылысын кешеуілдетіп жатқан жауапты мекемелерге қатаң сын айтты.