Алматыда әр бесінші мопед тіркелген: Курьерлік қызметтер мотокөлікті көбейтіп жіберді

2025 жылы Қазақстандағы мотокөлік нарығы тұрақсыз динамика көрсетті. Сәуір–тамыз аралығында тіркелген техника саны 115,9 мыңнан 135,3 мыңға дейін өсіп (16,7%), кейін қыркүйекте ІІМ деректерді жаңартуына байланысты 14,4%-ға күрт төмендеді. Бұл сұраныстың азаюы емес, есепті нақтылаумен байланысты болды. Қазаннан 2026 жылғы ақпанға дейін көрсеткіш қайта баяу өсіп, 118,7 мыңға жетті, деп хабарлайды Orda.kz Energyprom.kz сайтына сілтеме жасап. 

Мотокөліктерді тіркеу айтарлықтай артып келеді. 2024 жылы 4,9 мың болса, 2025 жылы 46,2 мыңға жетіп, 9,4 есе көбейді. Негізгі өсімді жеңіл мотокөлік (әсіресе мопедтер) қамтамасыз етті. Бұған 2025 жылғы 5 сәуірден бастап мопедтерді міндетті тіркеу, жүргізуші куәлігі, техникалық тексеріс және сақтандыру талаптарының енгізілуі әсер етті. Соның нәтижесінде бұрын тіркелмеген көліктер жаппай заңдастырылды.

2026 жылғы ақпанда мотопарк құрылымында классикалық мотоциклдер – 72,2 мың, трициклдер мен квадроциклдер – шамамен 1,1 мың, ал шағын кубты техника – 45,4 мың бірлік болды. Оның 66%-дан астамы қытайлық мопедтер.

Өңірлер бойынша ең көп мопед Алматыда – 9,4 мың. Қаладағы әр бесіншісі мопед тіркелген. Одан кейін Алматы, Жамбыл, Түркістан, Ақмола және Қарағанды облыстары. Бұл әсіресе курьерлік қызметтердің дамуы мен шағын бизнестің үлесіне тікелей байланысты.

Оқи отырыңыз:

• Жол ережесін бұзған мопед жүргізушілері бас бостандығынан айырылуы мүмкін
• Ақтөбеде мопед тізгіндеген 8-сынып оқушысы жол апатына ұшырады
• Елімізде барлық мопед жүргізушісі мемлекеттік тіркеуден өтуге міндеттелді