Алматыда алғаш рет дроппер әйел ұсталды

Алматыда өз банк деректерін өзге адамдарға пайдалануға берген әйел ұсталды, деп хабарлайды Orda.kz.

ІІМ мәліметінше, Алматы қаласының тұрғыны жаңадан енгізілген ҚР Қылмыстық кодексінің 232-1-бабы бойынша қылмыстық жауапкершілікке тартылған. Бұл бап алаяқтардың ұрланған ақшаны қолма-қол ақшаға айналдыруына немесе өзге шоттарға аударуына жол беретін қаржылық делдалдардың әрекеттеріне тосқауыл қоюды көздейді.

Тергеу кезінде жеке кәсіпкер өз тіркеу деректері мен QR-кодын белгісіз адамдарға бергені анықталды. Сол деректер арқылы алаяқтық белгілері бар күмәнді ақша аударымдары жасалған. Әйел ұсталып, уақытша ұстау изоляторына қамалды.

«Бұл – банктік деректерін заңсыз операциялар үшін пайдалануға бергені үшін қылмыстық жауапкершілікке тартылып, қамауға алынған еліміздегі алғашқы жағдай. Жаңа норма бұған дейін жазасыз қалып келген қаржылық алаяқтық тізбегін тоқтатуға мүмкіндік береді», – деді Алатау аудандық полиция басқармасы бастығының міндетін атқарушы Тимур Мулинов.

Еске сала кетейік, «дроппер» деп аталатын тұлғаларға қатысты қылмыстық жауапкершілік 2025 жылғы 16 қыркүйектен бастап енгізілді.