19 жастағы екі студент дроппер алаяқтықпен айналысқан

Қостанай облысында сот алаяқтардың құрбаны болған әйелдің 19 жастағы екі студентке қарсы талап арызын қанағаттандырды. Олар дроппер ретінде жұмыс істеп, алаяқтарға бөтен ақшаны алуға көмектескен, деп хабарлайды Orda.kz.

Жоғарғы сот мәліметінше, жәбірленуші әр студенттен тоғыз миллион теңге өндіруді талап еткен. Жауапкерлердің бірі өзінің кінәсіз екенін айтып, алаяқтардан ешқандай пайда көрмегенін мәлімдеді,  ол картасына түскен қаражатты бірден алаяқтарға аударып жіберген.  

Екінші студент өзіне аударылған күмәнді қаражат туралы ештеңе білмейтінін және банк шотын ашпағанын айтты. Алайда, бұл нұсқа сотта расталмады: дәлелдер оның шотты өзі ашқанын және банк қосымшасын орнатып, оған биометрия арқылы кіргенін растады.  

Соттың шешімі бойынша, екі студент те алаяқтардың құрбаны болған әйел есебінен негізсіз баюға жол берген деп танылды — тіпті қаражатты бірден алаяқтарға қайтарған күннің өзінде. Енді дропперлер әйелге тоғыз миллион теңгеден төлеуі тиіс. Шешім әлі заңды күшіне енген жоқ.  

Жалпы соңғы кезде елімізде алаяқтықтың бұл түрі көбейіп кеткен. Дроппер қарапайым тілмен айтқанда, заңсыз ақша аударымдарына немесе басқа да қаржылық операцияларға көмектесетін адам дегенді білдіреді. Дропперлер әдетте өз атына банк шотын ашып, оған түскен қаражатты негізгі алаяқтарға аударып отырады. Алаяқтардың тапсырмасы бойынша өз атына шот ашады немесе бар шотты пайдаланады.